اسلام آباد۔7جون (اے پی پی):وفاقی وزیر اطلاعات و نشریات مریم اورنگزیب آکھیے جو وزیراعظم شہباز شریف اڄ بزنس کانفرنس اچ پاکستان دی معاشی ترقی اتے خوشحالی کیتے آپݨا وژن کاروباری برادری دے سامݨے پیش کریسن ۔ آپݨے ھک بیان اچ انہاں آکھیے جو وزیراعظم شہباز شریف اڄ بزنس کانفرنس توں خطاب کریسن ۔ بزنس کانفرنس اچ پورے ملک توں کاروباری برادری شرکت کریندی پئی اے ۔ وزیراعظم کاروباری برادری نال بجٹ تے اہم مشورے وی کریسن، انہاں آکھیے جو زراعت، فوڈ سکیورٹی، توانائی، آئی ٹی، ٹیکسٹائل، مینوفیکچرنگ، برآمدات اتے ٻئے شعبیں توں تعلق رکھݨ آلے کاروباری حضرات کانفرنس اچ شرکت کریندے پئن ، وزیراعظم کانفرنس اچ میثاق معیشت کیتے نیشنل ڈائیلاگ دا آغاز کریسن ۔ وزیراعظم کاروباری شخصیات توں تجویزاں گھنسن تے آپݨی حکومت دے مستقبل دے لائحہ عمل تے اعتماد اچ گھنسن ، انہاں آکھیے وزیراعظم کانفرنس اچ ملک کوں پیش آندے معاشی مسئلیں دے حل کیتے فوری، وسط اتے طویل المدتی اقدامات تے ڳالھ مہاڑ کریسن ، ایں توں علاوہ وزیراعظم مالی سال 23 ۔ 2022 کیتے بجٹ تجویز وی حاصل کریسن ۔
