اسلام آباد۔17اپریل(اے پی پی) قومی اسمبلی دی قائمہ کمیٹی خزانہ ومحصولات پنجاب اتے خیبرپختونخوا اچ انتخابات کیتے فنڈز دی فراہمی دامعاملہ کابینہ اتے قومی اسمبلی بھجواوݨ دی ہدایت کیتی اے ۔ قائمہ کمیٹی خزانہ ومحصولات دااجلاس سنوار کوں اتھاں پارلیمنٹ ہائوس اچ قیصراحمد شیخ دی زیرصدارت منعقد تھیا ۔ اجلاس اچ وفاقی وزیرقانون اعظم نذیرتارڑ، وزیرتجارت سید نویدقمر، وزیرمملکت خزانہ ڈاکٹرعائشہ غوث پاشا، معاون خصوصی طارق باجوہ، اٹارنی جنرل، سٹیٹ بینک اتے ٻئے اداریں دے متعلقہ حکام اتے ارکان شرکت کیتی۔وفاقی وزیرقانون کمیٹی کوں ݙسایا جو قومی اسمبلی اتے سینیٹ دی قائمہ کمیٹیاں منی ٻل 2023 مستردکرݙتے۔ انہاں ݙسایا جو سپریم کورٹ الیکشن کمیشن کوں پنجاب اتے خیبرپختونخوااچ انتخابات منعقدکراوݨ کیتے سٹیٹ بینک کوں فیڈرل کنسالیڈیٹیڈفنڈ توں 21 ارب روپے ݙیوݨ دی ہدایت کیتی اے ۔قانون تے ضوابط دے مطابق ایں رقم دے استعمال کیتے قومی اسمبلی توں منظوری گھنݨ ضروری اے ، انہاں آکھیے انہاں دے خیال اچ اے معاملہ قومی اسمبلی اچ پیش تھیوݨا چاہیدے ۔ کمیٹی دے رکن برجیس طاہرآکھیے 13 اپریل کوں قائمہ کمیٹی ایں ٻل کوں مسترد کرݙتا ہئی، ساݙا موقف اے جو پنجاب اچ پہلے انتخابات توں باقی صوبیں اچ انتخابات تے اثرات پوسن ۔قائمقام گورنرسٹیٹ بینک سیما کامران ݙسایا جو سٹیٹ بینک کوں سپریم کورٹ داحکم آیا تاں او پیش تھیاں ۔ انہاں ݙسایا جو میں عدالت کوں ݙسائے جو اساں پیسے مختص کرسڳدوں مگرایندی منظوری وزارت خزانہ ݙیسی وزیرقانون ݙسایا جو سپریم کورٹ ہدایت کیتی اے جو ایں کیتے ایکس پوسٹ فیکٹواجازت ڳھدی ونڄے۔ اٹارنی جنرل کمیٹی کوں ݙسایا جو قومی اسمبلی آکھیے منی ٻل دی منظوری نہ ݙتی ویسی تاں ایں صورت اچ ایکس پوسٹ فیکٹومنظوری مشکل تھی ویسی ۔ اٹارنی جنرل ݙسایا جو وزارت خزانہ سپریم کورٹ دے حکم تے ڈیمانڈ کابینہ اتے قومی اسمبلی کوں بھجوائے، حتمی منظوری قومی اسمبلی ݙیوݨی اے ایں عمل کوں آئین دے مطابق کیتا ویسی ۔
