اسلام آباد۔10جنوری (اے پی پی) پاکستان انٹرنیشنل ایئر لائن (پی آئی اے) دا یورپ کیتے آپریشن بحال تھی ڳئے۔ جمعے کوں اسلام آباد انٹر نیشنل ائیر پورٹ توں پیرس پہلی پرواز روانہ ، وفاقی وزیر ہوابازی خواجہ محمد آصف مسافراں کوں الوداع کیتا۔ یورین یونین ولوں قومی ایئرلائن تے ساݙھے چار سال پابندی لا رکھی ہئی جئیں دے خاتمے دے بعد اے پروازاں بحال تھی ڳئن۔ایں موقع تے خطاب کریندیں ہوئیں وزیر دفاع و ہوابازی خواجہ محمد آصف یورپ کیتے پروازاں دی بحالی کوں تاریخی قرار ݙیندیں ہوئیں آکھیا جو قومی ایئرلائن پورے یورپ اچ آپریٹ کریسی۔ وزیر ہوابازی ݙسیا جو پی آئی اے دی برطانیہ اتے امریکہ کیتے پروازاں وی شروع تھیسن۔ انہاں آکھیا جو پی آئی اے دی نجکاری کیتی ویسی اتے ایندے بیڑے کوں ودھایا ویسی۔ ایں موقع تے وزارت ہوابازی دے سئنئر افسر، قومی ایئرلائن اتے ایئرپورٹ حکام وی موجود ہن۔
