لاہور۔6دسمبر (اے پی پی) نگران وزیراعلیٰ پنجاب محسن نقوی دا چولستان دے بے زمین کاشتکاراں کیتے تاریخ ساز کم کیتے، انہاں دی ہدایت تے 45 سال توں کاشتکاراں کوں زمین دی الاٹمنٹ دا رکیا ہوئیا کم کجھ مہینے اچ پورا کر ݙتے اتے 27 ہزار کاشتکاراں کوں ترائے لکھ 44 ہزار ایکڑ زمین قرعہ اندازی دے ذریعے الاٹ کر ݙتی اے۔ چولستان دے کاشتکاراں کوں زمین دی الاٹمنٹ کیتے وزیر اعلیٰ آفس اچ کمپیوٹرائزڈ قرعہ اندازی کیتی ڳئی۔ وزیراعلیٰ محسن نقوی چولستان دے کاشتکاراں کوں اراضی دی الاٹمنٹ کیتے بٹن دبا تے کمپیوٹرائزڈ قرعہ اندازی کیتی۔ تقریب توں خطاب کریندیں ہوئیں انہاں آکھیا جو ستاوی ہزار کاشتکاراں کوں ساݙھے 12 ایکڑ فی کس زمین پنج سال دی لیز تے ݙتی ویسی۔ 45 سالیں بعد جنوبی پنجاب دے ترائے ضلعے رحیم یار خان، بہاولنگر اتے بہاولپور دے غریب کاشتکاراں کوں انہاں دا حق ݙتے۔ انہاں آکھیاجو او جلدی چولستان آ تے قرعہ اندازی اچ کامیاب کاشتکاراں کوں الاٹمنٹ دے کاغذات ݙیسن۔ صوبائی وزرا عامر میر، اظفر علی ناصر،چیف سیکرٹری زاہد اختر زمان اتے سینئر ممبر بورڈ آف ریونیو نبیل جاوید وی کمپیوٹرائزڈ قرعہ اندازی کیتی۔ کمشنر بہاولپور ڈویژن، ممبر کالونیز بورڈ آف ریونیو، ایم ڈی چولستان ڈویلپمنٹ اتھارٹی، ڈی جی پنجاب انفارمیشن ٹیکنالوجی بورڈ، سیکرٹری نجکاری بورڈآف ریونیو، ممبر آئی ٹی بورڈ آف ریونیو اتے متعلقہ حکام وی ایں موقع تے موجود ہن جڈانجو ڈپٹی کمشنر بہاولپور ویڈیولنک دے ذریعے قرعہ اندازی دی تقریب اچ شریک تھیے۔
