اسلام آباد۔18جنوری (اے پی پی):وفاقی سیکرٹری اطلاعات و نشریات شاہیرہ شاہد آکھیے جو ملک کوں معیشت سودھے مختلف چیلنجز درپیش ہن، امید اے سیاسی جماعتاں مسئلیں دا ادراک کریندے ہوئیں چیلنجز دے حل کوں انتخابی منشوردا حصہ بݨیسن ، پریس انفارمیشن ڈیپارٹمنٹ (پی آئی ڈی) چیلنجز تے قابو پاوݨ تے ملکی صورت حال کوں بہتر بݨاوݨ دی مثبت تجاویز تلاش کرݨ سانڳے ھک بحث دا آغاز کیتے جیڑھا جو خوش آئند اے۔ اے ڳالھ انہاں ”پاکستانی رائے دہندگان دا بدلدا منظر نامہ اتے منصفانہ نمائندگی اچ سیاسی جماعتاں دا کردار” دے عنوان توں پریس انفارمیشن ڈیپارٹمنٹ دے زیر اہتمام سیمینارزدے تسلسل دے چوتھے سیمینار توں افتتاحی کلمات اچ آکھی اے ۔ انہاں آکھیے عام انتخابات دے حوالے نال اسٹیک ہولڈرز کوں سیمینارز دے ذریعے اپݨی صلاح دا موقع ݙیوݨ تے پریس انفارمیشن ڈیپارٹمنٹ دیاں کوششاں قابل تعریف ہن، انہاں سیمینارز دا بنیادی مقصد نہ صرف آگاہی ݙیوݨ اے بلکہ لوکاں کوں اعتماد دے نال ڳالھ کرݨ سانڳے ھک پلیٹ فارم ݙیوݨ اے۔ ۔واضح رہے جو پریس انفارمیشن ڈیپارٹمنٹ دے زیر اہتمام منعقدہ سیمینارز اچ مختلف سیاسی جماعتاں شرکت کریندیاں پئن تے ذرائع ابلاغ دے نمائند ے اتے ماہرین تعلیم وی مباحثے اچ شرکت کرتے آپݨی تجویزاں پیش کریندے پئن۔
