کوئٹہ۔1اگست (اے پی پی) وزیر اعظم شہباز شریف دی بلوچستان اچ بارشاں اتے سیلاب پاروں جاں بحق تھیوݨ آلے ورثا کوں معاوضہ چووی گھنٹیاں اچ ݙیوݨ دی ہدایت کریندیں ہوئیں آکھیا جو اڄوکا چیلنج ٻہوں وݙا اے، متاثرین دی بحالی تئیں چین نال کائنا ٻہساں۔ اے ڳالھیں انہاں سنوار کوں کوئٹہ آوݨ تے بارشاں اتے سیلاب پاروں تھیوݨ آلی ضیان بارے بریفنگ اچ آکھی۔ وفاقی وزیراطلاعات ونشریات مریم اورنگزیب ، وفاقی وزیر ہائوسنگ مولانا عبدلواسع ، وفاقی وزیر دفاعی پیداار اسرار ترین اتے وفاقی وزیر انسداد منشیات نوابزادہ شاہ زین بگٹی، وزیر مملکت برائے بجلی میر ہاشم نوتیزئی ، رکن قومی اسمبلی اے صلاح الدین ایوبی اتے چیئرمین این ڈی این اے لیفٹیننٹ جنرل اختر نواز وی ایں موقع تے موجود ہن۔ کوئٹہ پڄݨ تے وزیرِ اعظم کوں چیف سیکرٹری بلوچستان عبدالعزیز عقیلی اتے چیئرمین این ڈی ایم اے لیفٹیننٹ جنرل اختر نواز بلوچستان اچ اڄوکی بارشاں بارے اتے امدادی کماں بارے بریفنگ ݙتی۔ وزیراعظم این ڈی ایم اے کوں بلوچستان اچ بارش اتے سیلاب اچ جاں بحق تھیوݨ آلیاں دے ورثاء کوں معاوضے دی رقم چووی گھنٹیاں اچ ݙیوݨ اتے جزوی تے پورے تھیوݨ آلے کچے اتے پکے مکاناں دے معاوضے کوں ہکو سواں کر تے اتے ودھا تے پنڄ لکھ روپے کرݨ دی ہدایت کیتی۔
