اسلام آباد۔21مئی (اے پی پی) چین ،پاکستان سفارتی تعلقات تھیوݨ دی 72 ویں سالڳنڈھ، چینی سفارت کانے اچ پاکستانی سفارتکاراں نال “چین پاکستان بے مثال دوستی اتے روشن مستقبل” دے عنوان نال استقبالیہ تقریب تھئی۔ تقریب دی مزمان خصوصی چینی سفارت خانہ دی ناظم الامور پینگ چنکسو، پاکستان دے سیکرٹری خارجہ ڈاکٹر اسد مجید خان، فارن سروس اکیڈمی دے ڈائریکٹر جنرل مظہر جاوید استقبالیہ توں خطاب کیتا۔ استقبالیہ تقریب اچ چین اچ وزارت خارجہ دے حکام، چین اچ سابق پاکستانی سفیراں اتے چینی سفارت کاراں دے علاوہ نوجوان پاکستانی سفارت کارشریک تھیے۔ پینگ چنکسو چینی سفارت خانے اچ دوستاں دا خیرمقدم کیتا اتے ایں ڳالھ تے زور ݙتا
جو چین اتے پاکستان دے تعلقات دی ڳھاٹی جڑاں، ٹھوس عوامی حمایت اتے اہم عملی لوڑھ تے مشتمل ہن۔ انہاں آکھیا جو ایں سال صدر شی جن پنگ دے تجویز کردہ ’بیلٹ اینڈ روڈ انیشیٹو‘ دی 10ویں سالگنڈھ اتے چین پاکستان اقتصادی راہداری دے آغاز دی 10 ویں سالڳنڈھ اے۔ انہاں آکھیا جو ݙوہیں پاسوں سانجھی کوششاں نال سی پیک صنعت، زراعت، آئی ٹی، آفات توں بچاؤ اتے تخفیف غربت وغیرہ دے شعبیاں اچ ثمر آور نتیجے حاصل کیتن۔ جئیں پاکستان دی اقتصادی اتے سماجی ترقی کوں ودھاوݨ، پاکستان دے انفراسٹرکچر کوں اپ گریڈ کرݨ اتے بہتر ٻݨاوݨ اچ اہم کردار ادا کیتے۔ پاکستانی عوام دی فلاح و بہبود، عوام وچال رابطے ودھاوݨ اتے علاقائی رابطے ودھاوݨ پاروں سی پیک چین پاکستان تعاون دی سںڄاݨ ٻݨ ڳے۔ انہاں آکھیا جو صدر شی جن پنگ دی مضبوط قیادت اچ چین اپݨی جدید کاری دے عمل کوں ثابت قدمی نال اڳوں ودھیندا پے۔ چین پاکستان سمیت ترقی پذیر ملکاں کوں چینی جدیدیت اچ نویں کامیابیاں دے موقع ݙیندا پے۔ چینی سفارتخانے دی ناظم الامور پانگ چنکسو آکھا جو 5 مئی توں 6 مئی تئیں چین دے ریاستی کونسلر اتے وزیر خارجہ کن گینگ پاکستان دا کامیاب دورہ کیتے۔
تقریب توں خطاب کریندیں ہوئیں سیکرٹری خارجہ ڈاکٹر اسد مجید خان چین اتے پاکستان دی بے مثال دوستی اتے تعاون دی کامیابیاں اچ ݙوہیں ملکاں دے سابق سفارت کاراں دے تعاون دی تعریف کیتی۔ انہاں آکھیا جو پاکستان اچ چینی سفارتخانے دے کمپاؤنڈ دی تبدیلی خود ݙوہیں ملکاں دی دوستی دے ودھارے دی گواہ اے، چین اپݨے سفارتخانے دا پچھلا کمپاؤنڈ حکومت پاکستان دے حوالے کیتے جیڑھا ساریاں توں وݙا کمپاؤنڈ ٻݨ ڳے۔ انہاں آکھیا جو چین پاکستان اقتصادی راہداری پاکستان دی معیشت اتے معاشرے اچ خوشحالی اتے ترقی تھئی اے جئیں پاکستان کیتے دل توں شکریہ ادا کریندے۔ “بیلٹ اینڈ روڈ انیشیٹو” دی 10ویں سالڳنڈھ اتے سی پیک دے آغاز دے موقع تے چین اتے پاکستان کوں سانجھے طور ایں یادگار لمحے کوں مناوݨا چاہیدے۔ ایں موقع تے پاکستانی نینگر سفارتکاراں آکھیا جو تقریب اچ استقبال ٻہوں گرمجوشی اتے متاثر کن ہئی، جئیں نال چین اتے سی پیک بارے انہاں دے علم اتے سمجھ اچ ودھارا تھیے اتے ݙوہیں ملکاں دے نینگر سفارتکاراں دی دوستی ٻی ودھ ڳی اے۔
