لاہور۔28جولائی(اے پی پی) نائب وزیراعظم تے وزیر خارجہ سینیٹر اسحاق ڈار داتا دربار لاہور حاضری ݙتی ، فاتحہ پڑھی تے ملک و ملت دی سلامتی سانڳے دعا منگی ۔ محمد اسحاق ڈار مزار شریف دی تعمیر تے توسیع دے کم دا وی جائزہ ڳھدا تے آندے عرس شریف بمطابق23 اگست 2024ء توں پہلے راہ داریاں کوں ہموار اتے زائرین سانڳے رستے کھلے رکھݨ دی ہدایت کیتی ۔ ایں موقع تے سیکرٹری اوقاف انہاں کوں بریفنگ ݙتی جو داتا صاحب دے سالانہ عرس مبارک توں پہلے ناگزیر تعمیراتی امورکوں سمیٹ تے زائرین اتے مہماناں سانڳے بہترین سہولتاں ݙیوݨ یقینی بݨائیاں ویسن ، لنگر خرید اتے ترسیل سودھے ٻئے امور سانڳے کمیٹیاں بݨا ݙتن ترجمان موجب مزار شریف دی تعمیر دا کم تکھے جاری اے جیں اچ اوقاف، نیسپاک، مدینہ فائونڈیشن وانجم حفیظ کنسٹرکشن دیاں ٹیماں ݙو شفٹاں اچ کم اچ مصروف تے سیکرٹری اوقاف روزانہ تعمیراتی امور کوں خود ݙیکھدے پئن ۔ ایں ضمن اچ پہلے مرحلے دی ڈیڈلائن15 اگست مقرر اے، ایندے بعد عرس دے حوالے نال مزار شریف دی فلورنگ کرتے زائرین سانڳے رستیں کوں ہموار تے سایہ دار کرݙتا ویسی ۔ ایں موقع تے ڈپٹی ڈائریکٹر ایڈ منسٹریشن اوقاف آصف اعجاز، ایڈ منسٹریٹر اوقاف توقیر محمود وٹو، مینجر زاوقاف داتا دربارشیخ جمیل احمد، طاہر مقصود،اوقاف، نیسپاک اتے کنسٹرکشن کمپنی دے انجینئرزسودھے ٻئے افسر موجود ہن
