راولپنڈی ۔31جنوری(اے پی پی):پاک فوج دے سربراہ جنرل سید عاصم منیر دی زیر صدارت کورکمانڈر کانفرنس عزم دوہرائے جو پاکستان کوں غیر مستحکم کرݨ کیتے دشمن قوتاں دے اشارے تے کم کرݨ آلے دہشت گرداں، سہولت کاراں اتے تخریب کاراں نال پورے زور نال نٻڑسی، کہیں کوں وی سیاسی سرگرمی دے ناں تے تشدد اچ ملوث ہووݨ اتے آزادانہ و منصفانہ انتخابات دے بہترین جمہوری عمل کوں خراب کرݨ دی اجازت نا ݙتی ویسی۔ پاک فوج دے سربراہ جنرل سید عاصم منیر دی زیر صدارت 262 ویں کورکمانڈر کانفرنس جی ایچ کیو راولپنڈی اچ تھئی ۔ فورم امن و استحکام کیتے عظیم قربانیاں ݙیوݨ آلے پاک فوج دے افسران ،جواناں ، قانون نافذ کرݨ آلے اداریاں اتے عوام کوں زبردست خراج عقیدت پیش کیتے۔ آرمی چیف جنرل سید عاصم منیر آکھیا جو پاکستان دی خودمختاری و علاقائی سالمیت مقدم اتے ناقابل تسخیر اے، پاکستان ساریاں ریاستاں نال پرامن بقائے باہمی تے یقین رکھدے، ملک دی خودمختاری، قومی وقار اتے پاکستانی عوام دی امنگاں تے کوئی سمجھوتہ نہ کیتا ویسی۔ اجلاس اچ بھارت ولوں ماورائے علاقائی و ماورائے عدالت قتل، ریاستی سرپرستی اچ دہشت گردی جاری رکھݨ، پاکستانی شہریاں کوں نشانہ ٻݨاوݨ دی بے رحمانہ مہم تے بریفنگ ݙتی گئی۔ فورم اتفاق کیتے جو بھارت ولوں بین الاقوامی قوانین دی کھلم کھلا خلاف ورزی اتے اوندا اصل چہرہ ڄڳ اچ بے نقاب کیتا ویسی۔ فورم فلسطین اتے غزہ دے عوام کیتے غیر متزلزل حمایت دا عزم دوہرایا اتے مسئلہ فلسطین دے مستقل جنگ بندی اتے پائیدار حل دی لوڑ تے زور ݙتے۔ فورم عام انتخابات 2024 پرامن ٻݨآوݨ کیتے الیکشن کمیشن آف پاکستان دا ہتھ ونݙاوݨ کیتے پاک فوج دی تعیناتی تے الایا۔ اجلاس اچ اسمگلنگ، ذخیرہ اندوزی، منی لانڈرنگ، بجلی چوری اتے غیر قانونی اجنبیاں سودھا غیر قانونی سرگرمیاں اتے جرائم پیشہ مافیاز دے خلاف اقدامات دی تعریف کیتی۔ اجلاس اچ فارمیشناں دی آپریشنل تیاریاں تے بریفنگ ݙتی گئی۔
.jpg)
