ریاض۔11نومبر (اے پی پی) وزیر اعظم محمد شہباز شریف آکھیا جو پاکستان اتے سعودی عرب وچال ݙھاکیاں توں برادرانہ تعلقات ہر ݙینھ نال ٻئے مضبوط تھیندے پئن، پاکستان دی ہنرمندی افرادی قوت کیتے سعودی عرب اچ روزگار دے موقع بارے جلدی وݙی پیش رفت متوقع اے۔ سنوار کوں وزیراعظم آفس دے پریس ونگ توں جاری بیان موجب وزیر اعظم محمد شہباز شریف نال سعودی عرب دے وزیر برائے سرمایہ کاری خالد بن عبدالعزیز الفالح اتے ایڈوائزر رائل کورٹ محمد التویجری عرب-اسلامک سمٹ دے موقع تے ملاقات کیتی جئیں اچ ݙوہیں ملکاں وچال اڄوکے اقتصادی تعاون بارے پیش رفت تے ڳالھ کیتی ڳئی۔ وزیراعظم آکھیا جو پاکستان اتے سعودی عرب وچال ݙھاکیاں توں برادرانہ تعلقات ہر ݙینھ نال ٻئے مضبوط تھیندے پئن، پاکستان دی ہنرمندی افرادی قوت کیتے سعودی عرب اچ روزگار دے موقع بارے جلدی وݙی پیش رفت متوقع اے۔ وزیراعظم خادم حرمین شریفین شاہ سلمان بن عبدالعزیز اتے سعودی ولی عہد اتے وزیر اعظم شہزادہ محمد بن سلمان کیتے نیک خواہشات دا اظہار کیتا۔ انہاں آکھیا جو فیوچر انویسٹمنٹ انیشیٹو فورم دے موقع تے سعودی ولی عہد و وزیراعظم محمد بن سلمان نال ملاقات ٻہوں فیدہ مند رہی اے۔ انہاں آکھیا جو سعودی وزیرسرمایہ کاری دا اڄوکا دورہ پاکستان اتے ݙوہیں ملکاں وچال سرمایہ کاری اتے معاشی تعلقات کوں مضبوط ٻݨاوݨ بارے ہک اہم سنگ میل ہئی۔ وزیراعظم اطمینان کریندیں ہوئیں آکھیا جو سعودی وزیر سرمایہ کاری دے اڄوکے دورہ پاکستان اچ تعاون دی 2.8 ارب ڈالر دی جیڑھی مفاہمتی یادداشتاں تے دستخط تھین انہاں اچوں اٹھ تے کم شروع تھی ڳئے۔ وزیراعظم عرب-اسلامک ملکاں دے غیر معمولی سربراہی اجلاس کراوݨ تے سعودی قیادت کوں خراج تحسین پیش کریندیں ہوئیں پرتپاک میزبانی تے سعودی حکومت دا شکریہ ادا کیتا۔ انہاں آکھیا جو اکتوبر اچ پاک سعودی بزنس فورم اچ پاکستانی اتے سعودی کاروباری اداریاں وچال ڳالھ مہاڑ نویں سرمایہ کاری دی راہ ہموار کیتی اے اتے پاکستان نال اقتصادی تعاون ڳھاٹا کیتے۔ خصوصی سرمایہ کاری سہولت کونسل (ایس آئی ایف سی ) دے ذریعے تھیوݨ آلی پیش رفت پاکستان اچ غیر ملکی سرمایہ کاری کوں تیز کرݨ اچ اہم کردار ادا کریندی پئی اے۔ وزیراعظم سعودی قیادت دے وژن 2030 دی تعریف کریندیں ہوئیں پاکستان ولوں ایندی پوری حمایت دا عزم کیتا۔ وزیراعظم آکھیا جو سعودی عرب اچ رہݨ آلے پاکستانی ݙوہیں ملکاں دی اقتصادی ترقی اچ اہم کردار ادا کریندے پئں۔ ملاقات اچ نائب وزیراعظم اتے وزیر خارجہ اسحاق ڈار، وفاقی وزیر اطلاعات تے نشریات عطاء اللہ تارڑ ، وزیراعظم دے معاون خصوصی طارق فاطمی وی موجودہن۔
.jpg)
