اسلام آباد۔14دسمبر(اے پی پی) وزیراعظم دی معاون خصوصی امورِ نوجوانان شیزہ فاطمہ خواجہ آکھیے جو نوجواناں کوں کاروبار دے ذریعے بااختیار بݨاوݨ تے سیلاب متاثرین دیاں سہولتاں کیتے کاروباری و زرعی قرضہ سکیم دا باضابطہ اجراء آندے ہفتے کیتا ویسی ، نیشنل یوتھ ایمپلائمنٹ پالیسی دا وختی اجراء کیتا ویسی ، ھک سال اچ 20 لکھ نینگراں کوں روزگار ݙیوݨ دا منصوبہ بݨائے ، سکلز ڈویلپمنٹ پروگرام دے تحت ھک لکھ نینگراں کوں تربیت ݙتی ویسی ۔ وزیراعظم یوتھ بزنس و ایگریکلچر لون سکیم دے تحت 50 ارب روپے ݙتے ویسن ۔ اے ڳالھ انہاں وفاقی وزیر اطلاعات و نشریات مریم اورنگزیب دے رلے پریس کانفرنس کریندے ہوئیں آکھی اے۔ انہاں آکھیے 2022ء اچ پاکستان مسلم لیگ (ن) اوکھی معاشی صورتحال اچ حکومت سنبھالی، وزیراعظم محمد شہباز شریف 68 فیصد نینگر جیڑھی پوری آبادی دا 15 کروڑ بݨدن ، کوں بااختیار بݨاوݨ تے قومی دھارے اچ رلاوݨ کیتے جامع منصوبہ بندی دی ہدایت کیتی، وزیراعظم دی رہنمائی اچ وزارت امور نینگراں دیاں ذمہ واریاں پوری کرݨ دی کوشش کریندی پئی ہاں ۔ انہاں آکھیے 15 کروڑ نوجوان ایں ملک دا قیمتی اثاثہ ہن، نوجوان نسل دی ودھ ساری محنت دے بغیر ایں ملک کوں پیش آندے مسئلیں توں کڈھݨا اے ، نینگر موجودہ حکومت دی صحت، تعلیم، روزگار سودھے سارے پالیسیاں دا محور ہن۔ انہاں آکھیے وزیراعظم دی ہدایت تے وزیراعظم یوتھ پروگرام نینگراں کوں ملک دا کارآمد اثاثہ بݨاوݨ کیتے کوشاں اے، ایں سلسلے دی ھک کڑی وزیراعظم یوتھ کاروبار و زرعی قرضہ سکیم اے۔ معاون خصوصی آکھیے اے پروگرام 2013 ءتوں ملک دے نینگراں کوں سوکھیاں شرطاں تے قرضے دی فراہمی یقینی بݨیندا پیا ہئی ، کجھ تبدیلیاں دے بعد ایں دا ول اجرا کیتا ویندا پئے۔ انہاں آکھیے18 توں 45 سال دے سارے نینگرایں اسکیم توں فیدہ چا سڳسن ، تریمتاں کیتے قرضہ سکیم اچ 25 فیصد کوٹہ رکھیا ڳئے ، قرضے ݙیوݨ کوں ترائے درجے اچ ونڈیا ڳئے ، پہلا درجہ5 لکھ، ݙوجھا 5 توں 15 لکھ، تریجھا درجہ 15 لکھ توں 75 لکھ اا اے۔انہاں آکھیے پہلے تے ݙوجھے درجے اچ شخصی ضمانت نال ہی درخواست دہندہ قرض گھن سڳسی ،شر ح سود پہلے درجے اچ صفر فیصد اے، ݙوجھے درجے اچ 5 توں 15 لکھ کیتے شرح سود 5 فیصد جݙاں جو تریجھے درجے اچ 15 توں 75 لکھ کیتے شرح 7 فیصد اے، اے قرضے 8 توں 9 سال دی مدت کیتے سوکھیاں شرطاں تے ݙتے ویندے پئن ۔ انہاں آکھیے وزیراعظم یوتھ پروگرام دے پورٹل دے ذریعے آن لائن درخواستاں ݙتیاں ونڄ سڳسن ۔ انہاں آکھیے کاروبار و زرعی سکیم دا باضابطہ اجراء آندے ہفتے وزیراعظم محمد شہباز شریف کریسن جیں دے بعد درخواست دہندگان pmyp.gov.pk دے ذریعے درخواستاں ݙے سڳسن ۔ درخواستاں دی وصولی دے بعد 45 ݙینھ دے اندر قرضہ ݙتا ویسی ۔
