اسلام آباد ۔ 5 مارچ (اے پی پی) محکمہ موسمیات اج جمعہ تے ہفتے کوں اسلام آباد، خیبر پختو نخوا، پوٹھوہار اتے کشمیر اچ ودھ سارا مینھ وسنڑ دی پیش گوئی کیتی اے ۔ودھ سارے مینھ وسنڑ پاروں ژوب، موسیٰ خیل، لورالائی، ڈی آئی خان، بنوں، کرک، وزیرستان، دیر، مالاکنڈ، سوات، پشاور، مردان، ہزارہ اتے کشمیر دے پہاڑی ندی نالیں اچ طغیانی دا ڈر ظاہر کیتے ، مسلسل مینھ وسنڑ پاروں کشمیر، گلگت، مالاکنڈ، دیر اتے ہزارہ دے پہاڑی علاقیں دیاں سڑکاں تے لینڈ سلائیڈنگ دا وی خطرہ اے ۔ غیر معمولی مینھ وسنڑ ،ژالہ باری تے تکھی ہوا پاروں خیبر پختونخوا تے اتلے تے جنوبی پنجاب اچ کنڑنک دی فصل کوں جزوی ضیان دا ڈر اے۔۔ رپورٹ دے مطابق آندے 24 گھنٹے دے دوران خیبر پختو نخوا، اسلا م آباد، پنجا ب، شمال مشرقی بلوچستان، کشمیر اتے گلگت بلتستان اچ کھمنڑ نال مینھ وسنڑ تے تکھی ہوا گھلنڑ دی توقع اے ،اتلے خیبر پختونخوا اچ کجھ جہیں تے ودھ سارا مینھ /ژالہ باری دا وی امکان اے۔ موسلادھار اتے مسلسل مینھ وسنڑ پاروں مقامی ندی نالیں اچ ظغیانی دا ڈر جڈاں جو سندھ اچ مٹی آلی ہوا گھلنڑ دے نال مینھ وسنڑ دا امکان اے ۔محکمہ موسمیات دے مطابق گزریل 24گھنٹے اچ بلوچستان، اتلے تے جنوبی پنجاب، خیبر پختونخوا اتے کشمیر دے کجھ ضلعیں تے اسلام آباد اچ ہوا دے نال مینھ وسیا جڈاں جو ملک دے بئے علاقیں اچ موسم رکھا رہیا ،ایں دوران بارکھان اچ 34 ملی میٹر، قلات 2، کوٹ ادو 17، ڈی جی خان 14، ملتان 12، اسلام آباد 10، بھکر 8، راولپنڈی 5، لیہ 5، بہاولپور 4، اٹک، نورپورتھل 3، فیصل آباد 2، ساہیوال، مری اتے جوہرآباد ہک، پاراچنار 15، بنو ں11، کاکول، بالاکوٹ 4، چراٹ، ڈی آئی خان 2، مظفرآباد 6 اتے گڑھی دوپٹہ اچ 2 ملی میٹر مینھ وسیا ۔خمیس کوں ریکارڈ کیتے گے گھٹ توں گھٹ درجہ حرارت دی رپورٹ دے مطابق استور اچ درجہ حرارت منفی 3، کالام منفی 2، گو پس اتے سکردو اچ صفر ڈگری سینٹی گریڈ ریکارڈ کیتا گے ۔
